سانسوردان گئدیر سؤزوم..

:: سانسوردان گئدیر سؤزوم..

سانسوردان گئدیر سؤزوم..


1.

سانسور قونوسونا توخونماق/ یازماق نه‌قدر وئریملی اولابیلر؟ اؤلکه‌میزده، بیلیریک سانسور چوخ یوغون و اؤنملی‌دیر. بو آرا یازارلارین سانسورا آلیشدیغیندان سؤز گئدیر؛ یازارلاریمیز اؤزلرینی اویوشدوروبلار دئییرلر سانسور قوراللارینا (بیلیریک قایدا قرار دئیه بیر شئی یوخدور سانسوردا!) بیلیرلر هانسی قونویا توخونماسینلار، نه‌دن کئچسین‌لر، نه‌یی یازماسین(یاراتماسین)لار. آنجاق سانسوردان دانیشماق سانسورون قدمتی قدر اوزانیب گئدیر. ناشرلرده آلیشیبلار دئمه.. (آلیشماسین نئی‌له‌سین؟!) یازار و البته ناشر چؤرک قازانمالی؛ بیر یؤندن.

2.

کئچن ایللر بیر کیتاب آلدیم (فارسجایا چئوریلمیش بیر کیتاب؛ آدینی گتیرمک ایسته‌میرم.. اوقدر اینجیتدی بیله‌می!) La psychanalyse du texte litteraire باشلیغینی داشیییر؛ Jean Bellemin-Noel آدلی یازار یازمیش. کیتابی چئوین هئچ یئرده اورژینال متنین سانسور ائتمه‌ییندن یازمامیش.. آمما؛ ص 23 و ص 25 ده گؤروروک بیر ایکی بؤلوم یوخدور.. بئله‌کی 2.2.1 بؤلوم بیردن اولور 3.2.1 بوردا نه اولور نییه گلمه‌ییب..؟! هئچ یئرده دئییلمیر. کیتابی اوخودوغومدا ائله بوردان بیر ضربه کیمی وورولدو باشیما و قویدوم یئره؛ داها اوخوماغی خوش گلمیردی (البته بوراخان دئییلدیم! سونرالار اوخودوم) آنجاق نه خالقی، نه اوخوجونو، نه یازاری.. هئچ کیمی وئجینه آلمادان گؤتوروب کسمیش دئمه‌میش ده.. بلکه ترجمه ائتسه‌یدی سانسور اولاجاقدی ائله.. یا چئوری‌دن سونرا سانسور اولموش‌دور.. آنجاق بونون بیر یئرده یازماغی گرک‌دی.. دؤرد صفحه «یادداشتِ مترجم» واری بو کیتابین؛ هئچ اولماسا اوردا یازمالی‌یدی! نه ایسه سانسور اوقدر ایشله‌میش کی.. سومویون ایلییینه قدر!

ایکی گون اؤنجه «بفرمایید فلسفه! (1)» باشلیقلی کیتاب آلدیم. صاباحی دا بیتیردیم. بو کیتاب دا بئله.. اورژینال متنین ایکی فصلینی کسمیش‌لر.. نه ایسه أن آزی «کرگدن» یاییم ائوینده یوخسا چئویرمن‌لرینده بو شعور و دوشونجه وارکی دئسین کیتابدا کسیلمیش بؤلوملر وار.. بیرجور آدام قاورایابیلیر بونو.. دوزدور؛ ایچگی (wine) و آللاه‌سیزلیق (atheism) چئوریلسه ده سانسورا معروض قالاجاق! آمما چئویرمن‌لر «پیشگفتار» یازیلارینین آلت‌یازیسیندا بونو دئمیش‌لر.. آنجاق بونلارین دا باشقا بؤلوملرده کسیلن سؤزلر وار.. کیتابین اورژینالی سس اولاراق www.phlosophybites.com یوکله‌نیب‌دیر! ایکی بؤلومونو دینله‌دیم (چئوریلمیشلردن بیری و چئوریلمه‌میشلردن ده بیرینی)؛ بللی‌دیر کیتابدا [...] گلن یئرلرده کسیلمیش پاراگرافلار وار (چئویرمن‌لرین دئدیکلریندن ساوای!) بو آدامی اینجیدیر.. گومان دا ائتمیرم بو کسیلمیش پاراگرافلار سانسورچینین ایشی اولسون.. (حقوق اقلیت‌ها (هم‌جنس‌گرایی و ... سؤز گئدرکن)؛ مسئله شر؛ و ..) بونلار سانسور اداره‌سینه (ارشاد!) وارمادان سانسور اولموش! و فاجعه ده بوردا..

3.

بعضی‌لری گنج یازارلارا اؤیود اولاراق (بلکه ده اؤنری!) بئله‌بئله قونولارا (جینسل؛ ائروتیک.. نه‌بیلیم باشقا..) توخونما دئییرلر؛ اؤزومه نئچه کره وورغولایان اولوبدور! خیر نیّت‌لری ده وار. کیتابلار چاپ اولسون دئیه..

منیم ده دغدغه‌م جینسل گؤرونتولر یاراتماق یا یازماق یوخسا پورنوگرافی دئییلدیر. سانسوردان گئدیر سؤزوم. آلت‌بیلینجیمده سوره‌کلی سونجوقلایان بئله‌بیر شئی وارسا یاراتماق ایشینه کسین انگل اولاجاق. سؤز بودور. بیزیم دوشونوروموز قاتلاشیب بونا! اؤزونو ده دئییل باشقاسینی دا سانسور ائدیر.. باشقاسینا دا یئتیرمه‌یی.. (قاتلاشماسین نه ائتسین..؟! بونو دا سوروشابیلریک.) 

منبع : شریف مردیسانسوردان گئدیر سؤزوم..
برچسب ها : آنجاق ,ایکی ,گئدیر ,بونو ,کیتاب ,سؤزوم ,گئدیر سؤزوم ,اورژینال متنین ,کیتاب آلدیم

یئنی کیتاب

:: یئنی کیتاب


اولدوزلاردان بیری قایمیشدی

یازار: شریف مردی


اؤیکو توپلوسو

ایچینده‌کی‌لر:

1- دیشاری‌می، ایچَری‌می؟

2- یئکه بیر داش کیمی...

3- اؤلوم

4- قاری

5- قیز

6- بوم بوش پارکین گئجه‌سینده

7- جیلخ گئرچک

8- سس

9- دؤرد نفر

10- من (من عاصی..)

11- من (دسمال اوسته سر منی)

12- من (تپه‌گؤز اولسایدیم بئله)

انتشارات: بوتا یایین ائوی


بو کیتابی تبریز (بیتیک؛ نباتی؛ انوربوک)، اورمیه (بوتا یایین ائوی)، اردبیل و قم شهرلریندن الده ائلده بیلرسیز.

یاخین گله‌جک‌ده زنجان، مشکین شهر، تهران‌دان دا آلا بیلرسیز...


منبع : شریف مردییئنی کیتاب
برچسب ها : یایین ائوی ,بوتا یایین

یارادیجیلیق

:: یارادیجیلیق


نورمال یاشایان اینسان، یاشادیغی توپلومدا هر شئیی اؤز نورموندا گؤرور؛ بو اینسانین ایچینه ییغیلان سؤز ده نورمال یاشامین نورموندا اولاجاق (طبیعی ایچینه سؤز ییغیلیرسه!). یارادیجیلیق دویغولارین توپلانیب پؤسگورمک حالینا گلن آدامین سؤزجوک‌لر یوخسا باشقا شئیلرله آنلاتابیله‌جک اؤرون‌دور. یاراتماق درددن آسیلی. بو اوزدن دردی اولمایان یازماق یوخسا یاراتماق صرافَتینه دوشمور هئچ. نه ایسه بو آنلاتیلان شئی کلمه‌لر یا دا باشقا چئشیت اینجه‌صنعت اثری اولور دا، او دردین اؤزو اولمور! آرادا مئتافوریک بیر کئچیش اولور، درددن کلمه‌یه، درددن رنگه، درددن سسه، بیر سؤزله درددن اثره و گؤرورسن درد جانلی وارلیق کیمی هله ده دوروب قالیر یئرینده و گؤز بوزاردیر سنه. بیتیب توکه‌نمه‌ین سورج‌دیر یاراتماق..

منبع : شریف مردییارادیجیلیق
برچسب ها : درددن ,یاراتماق

قلمه‌قوزان 4:

:: قلمه‌قوزان 4:

آشاغیداکی سؤزلر، حورمت‌لی عطیه طاهرینین فیس‌بوک صفحه‌سینده‌کی قلمه‌قوزان آدلی کیتابیما، اوخونوشو و دویغولاری اوزره یازدیغی سؤزلره سایین اکبر پاشایینین کامئنتی‌دیر.

اکبر پاشایی‌نین یازدیغی کامئنتی سئوینج‌له، آنجاق اؤتری وورغو ایله پایلاشیرام؛ بؤیله‌جه یاناشمالار، ادبی اله‌شتیری‌ده، عرب تئرمینی ایله «علم المعانی» قونوسونا سیغیشیر. بو تئرمینی آچیقلاماق اوچون دکتر محمدرضا شفیعی کدکنی، رستاخیز کلمات آدلی دَیرلی کیتابیندا گلن مقدمه‌ای کوتاه بر مباحث طویل بلاغت مقاله‌سینده بئله یازمیشدیر:

علم معانی علمی است که زیبایی و تأثیر آثار ادبی را فقط از دیدگاه ساختمان جمله مورد بحث قرار می‌دهد. در این علم که «رعایت مقتضای حال» جزءِ تعریف آن است، باید به این نکته‌ها رسیدگی کرد که در چه وضعی از نظر روانی شنونده، باید با او به اختصار سخن گفت و در چه وضعی با تفضیل. کجا می‌توان فعل را مقدم آورد و کجا بهتر است در آخر جمله بیاید. صفت‌ها را در کجای جمله قرار دهیم. از ادات تأکید کجا باید استفاده کرد.[1]

ایندی ایسه سایین اکبر پاشایی‌نین یازیسی:

کیتابین باشاباشی دئوریک جومله‌لرله دولودور؛ یانی اوندا گئدن دیل قورولوشو دانیشدیغیمیز برباد شیفاهی دیلین مکتوبلاشمیش وئرسیاسی‌دیر. سانیرام بو کیتابی اوخویانلار منیم کیمی اؤنجه‌دن اؤیرندیک‌لری قوروشلاری ایتیره‌جک‌لر، بو تیپ اثرلرین دیله گتیردییی زیانلار فایداسیندان چوخدور.

شیفاهی دیلین دئوریک قورولوشونون بیزه وئره‌جه‌یی فایدالار نه اولاجاق؟

بیر چوخ یئرده، یارادیلمیش ترکیبی جومله‌لرده فعل‌لر زامان باخیمیندان بیربیرینه اویوشمور؛ بو اوزدن متنی آنلاماغا بیر داها اؤزون، زامانلاری بیربیرینه باغلامالی دوروما گلیرسن.

منیم ادبی سبک‌لردن خبریم یوخدور، رومانی یالنیز اوندان آلاجاغیم لذت اوچون اوخویارام، تورکجه اولان کیتابلاردان دا یقین کی اؤیرنمک مقصدی ایله یولا چیخیرام. قلمه‌قوزانین ریوایتیندن ذره قدر ذؤوق آلمادیم، سایین یازاریمیز ایندییه کیمی اوخودوغو رومانلاری، تانیش اولدوغو یازارلارین آدلارینان بیرلیکده، بیر نئچه سؤز ده اونلار حاققیندا یئرلی یئرسیز کیتابین هر بوجاغینا جالاماق ایسته‌میشدیر. اوخوجو بو ریوایتی اوخومادان اول بیر خئیلک یازار واونلارین کیتابلارینان تانیش اولمالیدیر. طبیعی کی آخیجی اولمایان متنین ایچینده بو قارماقاریشیقلیغی کیتابین اؤزه‌للیی کیمی اوخوجویا سونماق اولماز.

کیتابدا شیفاهی دیله اولان ماراق و اَییلیم ده منیم اوچون خوشاگلمز مسئله‌لردن بیری‌دیر، آراسیرا گرامری سهولری ده گؤز آردی ائتمک اولماز.



[1]  شفعی کدکنی، محمدرضا؛ رستاخیز کلمات: درس‌گفتارهایی درباره نظریه ادبی صورتگرایان روس؛ انتشارات سخن، تهران؛ چاپ دوم 1391

منبع : شریف مردیقلمه‌قوزان 4:
برچسب ها : ادبی ,شیفاهی ,منیم ,کیمی ,کیتابین ,اوچون ,شیفاهی دیلین ,رستاخیز کلمات ,اکبر پاشایی‌نین ,سایین اکبر

اوچ چاپ اولموش کیتابلاریمین باشلیقلاری و ساتیش یئرلری

:: اوچ چاپ اولموش کیتابلاریمین باشلیقلاری و ساتیش یئرلری

اوچ چاپ اولموش کیتابلاریمین باشلیقلاری و ساتیش یئرلری:

کیتابلار:

1 ـ قلمه‌قوزان: اون فصله بؤلونن رومان، 1395

2 ـ اولدوزلاردان بیری قایمیشدی: اون‌ایکی اؤیکو توپلوسو، 1395

3 ـ یول آیریجیندا یازیلمیش حیکایه‌جیک‌لر: اللی دنه بئش‌یوز سؤزجوک‌دن آز اؤیکوجوک توپلوسو، 1395

ساتیش یئرلری:

1ـ قم: آقای سلیمانی و اؤزوم!

2ـ تبریز: انور؛ بیتیک (رحمانی‌فر)؛ نباتی

3ـ تهران: اندیشه نو (قوسی)

4ـ اردبیل: بهروز؛ منصور

5ـ زنجان: حکیم هیدجی (نعمتی)

6ـ اورمیه: بوتانشر (صبحدل)

منبع : شریف مردیاوچ چاپ اولموش کیتابلاریمین باشلیقلاری و ساتیش یئرلری
برچسب ها : یئرلری ,ساتیش ,ساتیش یئرلری ,توپلوسو، 1395 ,کیتابلاریمین باشلیقلاری ,اولموش کیتابلاریمین ,اولموش کیتابلاریمین باشلیقلاری

قلمه‌قوزان 5

:: قلمه‌قوزان 5

آشاغیدا گلن مقاله، خانم «رقیه کبیری»نین «قلمه‌قوزان» آدلی رومانیما یازدیغی تنقید و اوخونوش‌دور. اؤز درین سایغیلاریمی خانم کبیری‌یه بیلدیررک مقاله‌نی بوردا پایلاشیرام. یئری گلمیشکن دئییم بو مقاله «آذری» درگی‌نین یئنی ساییندا گلیب.

 

 

قلمه‌قوْزان؛ سوْبژکتیو بیر دونیا

 

   آیا حئکایه عالمینده اوْلایسیزلیغین اؤزونو بیر اوْلای سانماق اوْلارمی؟

   شریف مردی‌نین «قلمه‌قوْزان» اثرینده أن بؤیوک اولای، اولایسیزلیق اولسا دا راویله یازیچی أل‌بیر اولوب، اوخوجونون «باشینی قاتا» بیلمیش‌لر هله[قلمه‌قوزان، ص66]. بو اثری اوخویوب قورتاردیقدان سونرا بیر اوخوجو کیمی «باشیم قاتیلمادیغیندان» ساری نسه قیسا بیر جیزماقارایا ماراقلاندیم.

   و اولایسیزلیق آنلامیلا باغلی جیدّی بیر سوْرغو گؤز اؤنومده گؤیردی: اولایسیز بیر حئکایه یا روْمان دا اولارمی عجبا..!؟

   اوخوجو ایسه هانسیسا بیر روماندا هر صحیفه‌نی واراقلادیقجا اؤزل بیر اولای آختاریشیندادیر. لاکین اثر سوْنا چاتیر، آمما بورادا باشقا رومانلارا تای تانینمیش قایدالار اساسینداکی «اوْلای»دان ایز- توْز گؤرونمور. اولایسیزلیق بیزیم ادبیاتیمیزدا یئنی بیر حادیثه‌ اولسا دا، منجه حئکایه‌سل ادبیات تاریخینده هئچ بیر اولایسیز رومان یا حئکایه یوخدور. حتی مؤلّیف طرفیندن «چیلپاق یازی» آد وئریلمیش صادالادیغیم اثر ده، اولایسیز دئییل. آمما بو اولای اوخوجونون انتظاریندان ایره‌لی گئدیر. بو یؤندمده اثر یاراتماق منجه، اؤزو اؤزلویونده، ادبی بیر ژانر اوْلا بیلر.

   «حئیف.. بوللو بوللو اولایلی، شخصیتلی داستان سؤزو وئردیم ایکینجی بؤلومده، بورا گلینجه هامی کوسوب گئتمیش، داستان بوشالمیش سانکی. اولایدان زاددان خبر یوخ سونوندا؛ آدام بیلمیر نه‌دن باشینی قاتسین اوخوجونون...» [ص 66]

   یازیچی، اثرین سون صحیفه‌سینده یازیلمیش بو سؤزلرله اوخوجویا دیل- آغیز ائدیب، اونون بوراجان فورمالاشمیش ادبی ذؤوقونه توْخوندوغونا گؤره عذرخواهلیق کیمی بیر مقاما گلیب چاتیر. بو سؤزلر آچیق- آیدین گؤستریر کی، مؤلّیفین اؤزو هامیدان یاخشی بیلیر کی اوخوجو کوتله‌سینین بو طرزده حئکایه‌سل متن اوخوماغا حاضیر دئییل.

   ابتیدایی صحیفه‌لری اوخودوقدا نظره گلیر یازیچی آنباشی اؤزونو اورتایا آتیب، اثرده قئید اولدوغو کیمی «آت مینیب، دینگیلیم آتیب»[ص 38]، راوینی آرخاسیندا ساخلاییب، اونا مئیدان وئرمکدن چکینیر. اوْ، توپو اؤز سئودییی مئیدانا شوتله‌ییر. بو گؤز اؤنونده اولان چکیش- برکیشه رغماً، یازیچیله راوی‌ آراسیندا اؤنم داشییان اورتاق قوْنو، آنجاق کیتابلار اولور. هم یازیچی، هم ده راوی، کیتاب قوردو تک کیتابلاری ده‌لیک- دئشیک ائدیب، سونا چیخیرلار. آمما هر ایکیسی ده رومان‌ دونیاسیندا، اؤزللیکله دیل و فوْرم آراسیندا، سرگردان قالیرلار.

   ژاپن یازاری هاروکی موراکامی‌نین «کافکا ساحیلده» رومانینین سئویملی شخصیّتی «ناکاتا»، قلمه‌قوزان اوچون یارانیش سببی اولسا دا، ناکاتایا بنزرلیک گؤسترمیر. بعلاوه، شخصیت و فیزیک باخیمیندان بئله اونونلا ضدیت‌لی‌ گؤرونور. ناکاتا اوْلدوقجا صاف، ساده، آزبیلیکلی کاراکتردیسه، قلمه‌قوزان اونون عکسینه، بیلیک صاحیبی‌دیر. دونیا ادبیاتی ساحه‌سینده اؤزونو صاحیب‌نظر گؤسترمه‌یه چالیشیر. 

   قلمه‌قوزان دئدی‌یین آذربایجان فولکلوروندا خیالی بیر کاراکتر‌دیر. قلمه‌کیمی هم اوُزون بوْی، هم ده ده‌لیک- دئشیکدن کئچمه قابلیتی اولان، ذهنی بیر یارانیشدیر. همین یارانیش أسکی زامانلار عایله‌لرده اوشاقلاری قورخوتماق اوچون أل‌ائوینده‌کی ساده بیر کاراکتر ایمیش: «یئمه‌یینی یئمه‌سن قلمه‌قوزان گلیب سنی آپارار... واختیندا یاتماسان قلمه‌قوزان گلیب سنی قاچیردار». بو کیمی سؤزلرله اوشاقلاری خیالی بیر یارانیشدان قورخودارمیشلار. 

   بو کاراکتر قلمه‌قوزان اثرینده دام اوزرینده‌کی قارانلیق دونیادان چیخیب، یازیچی‌یا ساری ایره‌لی گلیر. بو دفه باجا- بوجادان گیرمیر. او، گوده بوْیو ایله یازیچی‌له بیرگه قاپیدان ایچری کئچیب، یوخاری باشدا پوشتویه سؤیکه‌نیر. یئنی یارانمیش قلمه‌قوزان یازیچینین ذهنینین یوخاری باشیندا أیله‌شیر.

    بو قلمه‌قوزا‌نین عاغلی توْپوغوندا دئییل، باجادان کئچن قلمه‌قوزانین عکسینه عاغیللی، ادبیات‌شوناس، دونیا سویّه‌لی آدلیم کیتابلاری تانییان گوده‌بوْیون بیریسی‌دیر. منه ائله گلیر کی، گونو گوندن رئآل چئوره‌دن اوزاقلاشیب، کیتابلارین خیالی دونیاسیندا مسکن سالمیش یازیچینین تنقیدچی ذهنی‌دیر قلمه قوزان.

   راوی یالنیز موراکامی‌نین اثرینده دایانماییب، بلکه پل‌ائستر، مارسل پروست، مین بیر گئجه ناغیللاری و فوئنتس کیمی یازیچیلارین آدلارینی چکدیکده، ادبیاتین بو بوداغیندان او بیری بوداغینا قونوب، دونیا سویّه‌لی آدلیم اثرلره توخونور.

   اثرین باشلانغیجیندا منه ائله گلدی کی کیتابلار دونیاسیندا سرگردان قالمیش یازیچی/ راوی دونیا ادبیاتینین بایراقلارینی گزدیرمکله باشچیلاردان علاوه قیراقداکی ایزله‌ینلرین ده دیقّتینی چکمه‌یه چالیشیب، ادبیات ساحه‌سینده‌کی بیلیک‌لرینی ناشی‌جاسینا اورتایا قویور. آمما گئت- گئده یازیچینین ادبی ژانرلارا گؤره تنقیدی باخیشی اورتایا چیخیر. یازیچی اؤز یازدیغی اثرین یوخاری باشیندا أیلشه‌رک، دیک باشلیقلا آردی- آردینا سوآللار وئریر. پروست‌دان باشلاییب، صالح عطایی‌نین «منیم آدلاریم» اثرینده سوآل ائله‌مه‌یی بوراخیر. 

   روایت دیلی اورتایا گلدیکده، ایسماعیل شیخلی‌نین «دلی‌کور» اثری‌نین آد‌ی‌یلا جیمز جویس یاناشی گئدیر:

   «دلی‌کوره گؤره، دیل مسئله‌سی منه اؤنملی ایدی. هردن یاواش اوخویوردوم، هردن اوجادان اوخویوردوم. جیمز جویس دئمیشدی، کیتابیمدا آنلامادیغیز بیر یئر وارسا، اوجادان اوخویون بیرده.... بیر داها دؤنمه‌دیم هئچ اونا. جاهاندار آغانین آدی بئله قالمادی بئینیمده... »[ص11]

   «اونا گؤره ده دلی‌کور قالارغی اولانمازدی دونیا سوییه‌سینده، سؤزو ایچین یازیلمیش، آداملاری ایچین یوخ، اؤزو ایچین یوخ، قوللوقدادیر کیتاب...»[ص11]

   بئله‌لیکله شریف مردی دیل قونوسونا دئتیشنده، قلمه‌قوزان و راوینین دیلیندن چیخمیش جومله‌لرایله متن و اوخوجو آراسیندا کورپو سالیب، دونیا سویّه‌لی قالارقی اثرلرین ندن‌لرینی اوخوجویا آچیقلاماق ایسته‌ییر. او چالیشیر گؤسترسین  «قوُللوقدا» اولان اثرلر دونیا سویّه‌سینده قالارقی اولانمازلار. 

   منسه بئله بیر نتیجه‌یه چاتیرام کی، قلمه‌قوزان اثرینده‌کی فولکلوریک قورخونج شخصیت همن یازیچینین ذهنینده‌کی تنقیدچی‌دیر. شریف مردی بو اثرده خیالی بیر کاراکتر واسیطه‌سیله، تورک ادبیاتیندا آدی قولاغمیزا تانیش گلن تنقیدچی‌‌نین یئربوْشلوغونو گؤسترمه‌یه جان آتیر. باشقا جور دئسم، چالیشیر بو نکته‌نی اوخوجویا چاتدیرسین کی تورک ادبیاتیندا تنقیدچی‌نین اوْلدوغو، خیال کیمی بیر تصوّوردور؛ دوروست قلمه‌قوزان کیمی.

   یئری گلمیشکن قئید ائتمه‌لی‌یم، فولکولوریک بیر شخصیتدن فایدالانیب، کیتابلاردان باشی چیخان، اؤزونه گؤره دوشونجه  صاحیبی اولان بیر شخصیّت یاراتماق بو اثرین گؤرکملی و مثبت عنصرلریندندیر. بونونلا بئله قلمه‌قوزان دا شعور و بیلیک‌ صاحیبی اولان یارانیشلارا تای، بیر آن بئله ده‌ییشیله بیلر. روایتده گؤرونن کیمی هشترخانا بئله چئوریله بیلر.

   سؤز یوُخودان گئتدیکده کیتاب قوردونا دؤنموش راوی فروید، یونگ، فرایا و لاکانین آدینی چکمکدن هئچ‌جوره چکینمیر. او، کیتاب رفلرینده یئرلشمیش فروْیدون بوتون اثرلرینی گؤزوندن کئچیرد‌ییینی سؤیله‌ییر.  لاکین بو عالیم‌لرین آدلاریندان دا بیر سیرا یازیچیلار کیمی اوزدن‌کئچمه کیمی اؤتوشور.

   مؤلیفین دیلی‌یله هله «زهله تؤکن» یئر اوردادی کی، یازیچی آلتینجی بؤلومده قوْللارینی چیرمالاییب، بئشینجی بؤلومده آردی- آردینا دوزولموش سوآللارا یوْزوم وئرمه‌یه چالیشیر. بلکه ده ذهنینده‌کی تنقیدچینین بوْش قالمیش یئرینی دوْلدورماق‌ ایسته‌ییر.

   آیری بیر زاویه‌دن باخسام، یازیچی چالیشیر پلات (plot)، پلان (plan)، قوُرولوش (structure) و چرچیوه‌سیز بیر «متن»ین نه اولدوغونو سؤزده دئییل، عملده اورتایا قویوب، اوخوجونون دیقّت نظرینی چکسین. او اوزدن رومان تکنیک‌لرینی مؤولانانین «مفتعلُ ، مفتعلُ، مفتعل» سایاغی قیمت‌لندیریب، دونیا سویه‌لی قالارقی اثرلرین یازی تکنیک‌لرینی، و آرتیق، تنقیدچیلری ده ائللشدیریر. آرتیرمالی‌یام کی، همین ائللیشدیرمه ده یازیچیلار و کیتابلارین آدلارینین گؤزدن کئچیریلمه‌سی کیمی «آت‌اوستو» بیر ائللشدیرمه‌دیر.

   «دئییر یازیچی دونیاسینی یارادیب، قیراقدا آلـلاه کیمی دوروب باخمالی، نه بیلیم دیرناق توتمالی و اؤز ایشینده اولمالی. دئییر اؤزونو یوخ ائتمه‌لی‌دیر یازیچی. سوروشا بیلریک کی! شیلتاقلیق دئییل‌می یارادیرکن دانماق؟ واریکن داهماق؟! یوخسا جویس ائستیون دئدالوسون احوالاتینی آنلادیرکن دوققوز یاشیندا اوغلان بئله سؤزلر یازا بیلرمی؟...»[ص40-41]

   یازیچی بو سوآللاری سوروشارکن، اؤز گوون‌لی‌یینی بیر داها تنقیدچی‌یه گؤسترمه‌یه جان آتیب، «پیتر بوردویو»نون (La Distinction) کیتابینین اوخوماغینی تنقیدچی‌یه تؤوصییه ائدیر. منجه متن دایره‌سینده اؤزونه بو قدر اینانیب، کیتاب قوردو اولان یازیچی‌ طرفیندن بئله بیر تؤوصییه‌لر هئچ ده غیرعادی نظره گلمه‌مک گرک.

   یازیچینین اؤز دئییشینه گوره باشی- دیبی بللی اولمایان بیر اثرده هئچ ده ذهنه سیغماز دئییل کی قلمه‌قوزان یارانیشیندان باشلاییب، بیر ایکی فصیل ایره‌لیده اونودولمامیش بیر سئوگی‌دن سؤز آچیب، اونو یاریمچیق بوراخیب، سانای آدلی قارداش قیزینین ائوجیک ماجرالارینا یاناشیب، سونرا راوی‌نین یاتاق اوتاغینین قاپیسینی آچاراق، رؤویالاردان، فروْیددان، نه بیلیم، ایچ دونیادان دانیشسین.

   شریف مردی یاراتدیغی اثرده تکجه بیر فصیلده قلمه‌قوزانا مئیدان وئریب، راوی و یازیچیدان مستقل اؤز باخیش آچیسینی اوخوجوسونون گؤز اؤنونده قویسون. منجه اون فصیله بؤلونموش بو اثرده کیتابین عنوانینی داشییان بیر شخصیتین باخیش آچیسینی انعکاس ائدن قیطعه‌لر چوخ آزدیر. ماراقلی‌ ایدیم راوی/ یازیچی کیمی قلمه‌قوزانین چوخ دانیشماغیندان  نمونه‌لر گؤروب ائشیدیم. بو اثری اوخویاندان سونرا بئله آلینیر کی بیزیم ادبیاتدا تنقیدچی قیتلیغی‌یلا سؤز قیتلیغی پارالل ایره‌لیله‌ییر.

   و سؤز یئری قالماسین دئیه، بو اثرده قادین ادبیاچیلاردان هئچ بیر ایز- توْز گؤرونمه‌دیییندن ساری مؤلیف چالیشیر اؤزونه مخصوص بیر طرزله بو مسئله‌نی آچیقلامامیش کئچمه‌سین. او، قورولوشون «ائرککسل» اولدوغونا توخونوب، «سؤزجوکلردن ائرککلیک یاغیر»، دئییر.

   «سوس گؤرک..باشدان باشا قادیندان سؤز گئتمه‌دی هئچ..»[ص46]

  «دئییر قادینلاری اونوتموشوق، اؤزوم فمنیست اولماسایدیم، آغیر گلیردی بلکه بو سؤز.»[ص46]

   همین آچیقلاما «اوْغرونون یادینا داش سالیر» مثَلینی خاطیرلادیر. بو بیر واقعیّت‌دی کی بیزیم جغرافیادا قادین اولماق، اؤزو اؤزلویونده، چتین بیر دوُرومدور؛ قالسین کی قادین یازیچیسی اولاسان. گومان ائتمیرم قادین ادبیاتچیلاریمیز ایچره آدلاری بو اثرده گلمه‌ین کیمسه‌لر گیلئیلی قالسینلار. اوسته‌لیک، منه ائله گلیر کی اؤزونو فمنیست تقدیم ائدن مؤلیفین کؤکونو، بیر چوخ فمنیست ائرکک‌لر کیمی، آتا‌بیلی‌لیکدن باغلامسیز آنالیز ائتمک اولماز. 

   اثرین بیر چوخ یئرینده راویله یازیچی اوست- اوسته دوشورلر. بللی دئییل دانیشان راوی‌دیر یوخسا یازیچی! بلکه ده هر ایکیسی. الا بو کی تئلویزیونداکی مغنّی‌لر کیمی آرا- سیرا گئییم‌لر ده‌ییشیرلر.

   یازیچی/ راوی اعلان ائدیر کی بئله بیر یازی یازماغین آماجی «اؤزونو تانیماق»دیر. اؤزگه‌لرله ایشیم یوخ، اؤز سؤزومو دئییم: من بیر اوخوجو مقامیندا اثرین سونونا چاتاندا چوخ ایستردیم بیلیم کی یازیچی/ راوی نه قدر بو آماجا نایل اولموشدو.

   «قلمه‌قوْزان» شریف مردی‌نین رومان آدلاندیردیغی بیرینجی اثری‌دیر. منجه بو اثری اوخویان اوخوجولارا دونیا ادبیاتی‌له تانیش اولمالاری گرکلی‌دیر. اثری ده‌ریندن دوشونوب و اونو دوزگون ده‌یرلندیرمک اوچون لازیمدی اوخوجو دا مؤلیف کیمی کیتاب قوردو اولسون.

   کیتابی اوخودوغوم سوره‌ده همیشه‌کی سوآلیم بیر آن بئله ذهنیمدن قیراغا چکیلمه‌دی: «یازیچی هانسیسا بیر اثری یاراداندا آیا اوخوجوسونو دوشونوب اونو تانیمالی‌، اونون سلیقه‌سی‌یله یازمالیدیر یوخسا چوخلاری دئین کیمی، سن اؤز سؤزونو اؤزون بیلن کیمی دئه/ یاز؛ اوخوجونون آنلاییب آنلاماماسینین منه هئچ دخلی..!» منجه متن و اوخوجو آراسیندا دیالکتیکی بیر باغلیلیق دانیلمازدی. بونونلا بئله، گؤزدن آتمامالی‌ییق کی یازیچی اؤز بیلیک‌لرینه دایانیب، اثرینی یاراتمالی‌دیر. منتها مسئله‌نین ظرافتی بوردادی کی، لازیمدی اوخوجو، مؤلیفی هوندور و اوزاق اوفوق‌لری رصد ائله‌دییی مقامدان آشاغی چکمک یئرینه، اؤزونو اونون حدّی قدر یوکسلده بیلسین. اثردن آلدیقلاریما گؤره سانیرام بو قوْنودا یازیچی‌یلا من، ایکیمیز ده بیر دوشونجه‌ده‌ییک. من ده شریف مردی‌یه قاتیلیب، ادبی اثرین «قوللوقدا» اولماماسینا اینانیرام.

   هرچند قئید اتمه‌لی‌یم کی، قلمه‌قوزان بیر رومان مقامیندا منی بیر حرفه‌ای اوخوجو کیمی راضی سالا بیلمه‌دی. ایندی‌یه‌دک همیشه یئنی اثرلر و ژانرلار اوخوماق اوچون جان آتمیشام. قلمه‌قوزان‌سا تورک ادبیاتیندا فرقلی اولدوغو تصوّورویله ماراغیمی چکمیشدی. دئیه بیلرم اؤنجه‌دن هئچ بیر اؤزل پلانیم اولمادان اونو اوخویوب، آنجاق یوْزومومو یازمادان واز کئچه بیلمه‌دیم. بئله ائتگیلندیییم اوچون، دئمک، شریف مردی بوتؤولوکله اولماسا دا، اوست- اوسته اوخوجویا تاثیر قویماغی باشارا بیلمیشدی.

   کیتابین دیل قورولوشویلا چوخ یئرده راضی قالا بیلمه‌دیم. اوسته‌لیک، نامأنوس سؤزلرین ایضاح وئریلمه‌مه‌سینین یئرینی بوش گؤردوم و یازی قایدالارینین اوْرتاق معیاری اعتباریله اوچ نؤقطه یئرینه ایکی نوقطه (..) دن فایدالانماغین ندنیندن باش آچمادیم.

   شریف مردی‌ 1363-جو گونش ایلینده دونیایا گؤز آچمیش. یاشام چئوره‌سی(محیط زیست)موهندیسی‌دیر و حال حاضیرده قم شهرینده یاشاییر.

 

رقیه کبیری

1/5/1395

 

 

منبع : شریف مردیقلمه‌قوزان 5
برچسب ها : کیمی ,یازیچی ,قلمه‌قوزان ,بئله ,دونیا ,شریف ,شریف مردی ,دونیا سویّه‌لی ,یازیچی راوی ,تورک ادبیاتیندا ,کیتاب قوردو ,دونیا سویّه‌لی آدلیم

سانسور اولموش..

:: سانسور اولموش..

یئنیجه چیخمیش «اولدوزلاردان بیری قایمیشدی» کیتابیمدان «دسمال اوسته سر منی» آدیندا اؤیکو اوقدر باش گؤتوندن وردولار کی داستانا اوخشامادی.. نه ایسه کیتابدا گلدی.. اوخوجولاردان عؤذور دیله‌ییرم.

نه ایسه بوردا اؤیکونون بوتونو خیدمتیزده (بوردان ایسه PDF فرمتینده ائندیره بیلرسیز)!



من..


دسمال اوسته سر منی


گؤزلریم قیزیشیردی آغاجلارین سیرایلا گلیب کئچمه‌سینی سئزه‌رکن. اوزاق داغلارین باشی دا قوشولموش بیربیرینه گئدیردی. سیخیلدیم صندلی‌یه. یانیمداکینین باشی سویروشوب چینیمه دوشدو. توکلرینین قوخوسو خوش گلیردی بیله‌مه. یاستیغی باسیب توکلرینه سوخوردوم بورنومو. دنیز بوزارمیشدی بیز گلندن بری. قاپ قارا ایدی اورتالاری. دارتینیر گئری چکیلیردی. اورالارا باخیر چیپس خیمیرتده‌ییردیک. یئل اسیردی. اوشویوردوک. قول قولا قاییدیب یاتیردیق. دنیزین بده‌نیمیزه سالدیغی اوشوتمه‌دن‌می، یئلین جانیمیزا آتدیغی تیتره‌تمه‌دن‌می، بیربیریمیزی تک تنها اؤز اؤزوموز ایچین گؤردویوموزدن‌می نه‌دن آنجاق آلاهی ترپنه‌جه‌ییمیز قالمیردی و قوجاقلاشیب آزقالا گیریردیک بیربیریمیزه. بئلینی منه چئویریر اویور اویور دورور، هردن داها سیخ سینه‌مه باسیردی کوره‌یینی. دوداغیم قاچدی. گؤزومو یوموب یولا، هاوادا یاییلان دنیزین قوخوسونا، بورولا بورولا اوزانان آسفالتا دوشونور، مئهله‌نیردیم. یوخو باسیردی بیله‌می. اوتوبوس نننی ایمیش کیمی قوجاغینا آلمیش گئدیردی بیزی. هاوادا بولوت وار ایدی.


گؤی اوزو گؤم گؤی؛ بیرر بیرر آغاریردی اولدوزلار. اوزاقلاردا قبیر واردی. یول قیراغیندان آخیب گئدن چای ازلدن اؤیرنمیش هاواسینی چالیردی. دره‌دن آشیب قبیرداشلاری گؤردوم. بیربیرینه سیخیلیب یاتان اؤلولر. دیک دیک یاناشی دایانان باش‌داشی‌لار. اَییلیب سینیخان باش‌داشی‌لار. پیچیلتی وار ایدی هاوادا. قبیرلر اسکی قبیردی. بورالاردا تپه‌گؤز وار. بورالاردا دئو وار. بورالاردا آدام اوتان جاناوار وار. بورالاردا پیچیلتی وار. بورالاردا... های دوشدو. گؤی‌ده بولوت‌لار چاخناشدی. اوزاقدان قایا سسله‌ندی. ایلدیریم شاخدی. گؤی جیریلدی. یاغیش باسدی هریانی. یئره دوشن یاغیش دنه‌لری بیر ده آتیلیب گؤیه قالخماق ایسته‌ییردی. چارپازدان ووروردو. چای ساهمان اولوردو آشیب داشا. ازواق‌دا اولان قبیرلردن بیر گؤز بویلادی منی. توک‌لریم دیک دوردو. بوغازیم توتولدو. اَلیمی قالدیریردیم قولوم گلمه‌دی. دؤنوب قایایا ساری دیرماشدی. یوخ اولدو. قیشقیردیم، سس چیخمادی. بوغازیم دارا دورموش‌دو. بوغولوردوم. بیلدیم یوخو گؤرورم. دورماق ایسته‌دیم. دورا بیلمیردیم. سسیم چیخمیردی. ال آیاق چالیر گوجه‌نیردیم. بوینومو یاستیغا باغلایان سیجیم بوغوردو بیله‌می. الیمی بوغازیما چکیردیم. چیرپینیردیم...


یاغیش شیشه‌یه چیرپیردی. هاوا قارانلیقلاشمیش چیراقلارین ایشیغینی جیزان یاغیش دنه‌لری چارپازدان تؤکوردو. یولوندا ایدی اوتوبوس. اوزون نفس آلیب یانیمداکینا باخدیم، میشیل میشیل. توکلری آلنینی باسمیش شالی سییریلمیشدی. توکلرینی یانا ووردوم. بارماغیمین دالی یاناغیندا گزیندی. زاریدی. سیخیلیب صندلی‌یه منه دؤندو. اوتوبوسون ایچی قارانلیق ایدی. بورنونا یاخدیم بورنومو. دوداغی گولوش کیمی بیر شئی گؤرسه‌تدی. گؤزلرینین آلتیندا قیریش‌لار اولدو. یاناغی شیشدی. اؤپدوم. باشینی چیینیمه قویوب ایچه‌ری ووران ایشیغا باخدیم. یول جومجولوق اولموش سو آخیردی بیز گئدن وَرین ترسینه. بارماقلارینی سیخیردیم اَلیمده. دینمز سؤیله‌مز قیز بیرآزدان دوروب قویمایاجاقدی دانیشام هئچ. آرا وئرمه‌دن سؤزجوک سؤزجوک دوزه‌جک بیربیرینه، اؤتوره‌جک‌دی نازیک دوداقلاریندان. باخاجام. دوداقلاریندان چیخان سؤزلره گولوب باشیمی ترپه‌ده‌جم بیرآزدان.. پنجره‌دن آخان یاش‌لار قبیرلره گؤتوردو منی. اوردان دوروب باخان گؤزلر. اؤزومو گؤردوم شیشه‌ده. گؤزلریمین ایچینده‌کی قارا ببک ترپه‌ندی. اوزاق‌لار قارانلیق ایدی. یومورو شئی گؤزلریمین آغیندا قورخوتدو بیله‌می. باشیمی صندلی‌یه باسدیم. ایلک اؤپوشون دادی سونراسی اوره‌ک دؤیونتوسو بوغازیما قاچیرتدی قانی. اوره‌ییم آغزیمدان چیخاجاق‌دی. عمی قیزیمی اؤپوب، یالاییب گئری چکیلمیشدیم. اوتاغیمین اورتالیغیندا والای وورموش پنجَره‌یه یاخینلاشمیشدیم. گونش قیزاریردی اوندا .. دوداغیم قاچدی بیر آن. توکلری بوینوما ساریلان قیزی گؤروب بوراخدیم الینی. ایلک اؤپوشوم بونون دوداغیندان قارانلیغا گئدن هاوانین اؤرتوسونده کیتابخانانین زئرزه‌میسینه گئدن پیلله‌لرین اوستونده ایدی. گولوشه گولوشه قیقاجی باخان نگهبانین یانیندان اؤتوب چیخدیق بیلیم یوردوندان. دالیمیزدان یانینداکی آداما نه‌سه دئدی. قیزی یوخسا منی سؤیموشدو بلکه!


قیزی گؤتوروب چالوسا بیر ایکی گون تهرانین چیغیر باغیریندان قاچمیشدیم. نه قیزلار اؤپدوم، دیشله‌دیم، چیمدیک‌له‌دیم ایلک آلدیغیم قورخو ایله هیجان ایچینده قیزاران اؤپوشون دادینی آلا بیلمه‌دیم. عمی‌قیزیما گؤرسه‌تدیییم صیفت اوپوش سونراسینی بیله‌سینه زهریمار ائله‌میش زهله‌سی گئدیردی مندن. چئوره‌سینه بئله هره‌له‌نه بیلمیردیم. او ایسینتینی خاطیرلاییر آز قالا کؤکسومو دلیردی چیرپینان اوره‌ییم. ایکی تئرم چکدی یاخینلاشام بیلیم یوردونون قایناشان قیز دولو هاواسینا. ایلک داددیغیم داماغیمدا قالمیش‌دی. آرا وئرمه‌دن بیرینی ایکیسینی دادیر بوراخیردیم. سونوندا یانیمداکی قیز گیردی آرایا. تورکجه دانیشیر، دده قورقوددان، دیوان لغات الترک دان، ماناس دان دئییردی.. تورک‌جه‌دن دانیشدیق، من تورکم او تورک‌دو بس نییه تورکو دانیشمیریق! منه ماراقلی گلدی. تورپاق لابراتوواریندا گؤرموشدوم بیله‌سینی. منیم نمونه‌م یئتمیش ایکی ساعات‌دان سونرا گؤتورولمه‌لی ایدی. گیردیم لابراتووارا. باشقا کیلاس وار ایدی، من ایشیمده ایکن قیزین گؤزلرینی سئزدیم. توکلری آلنینی باسمیش هردن آت کیمی بوینونو قاهاریب گئری وئریردی اونلاری. معصوم معصوم باخماغیمی گؤردو. گولومسوندو. تورپاغیمی گؤتوروب قویدوم دستگاها.


طرح‌لریمی گؤستررکن بیله‌سینه یاخینلاشماسینی سئزدیم بیله‌مه. بیله‌ییندن توتوب چکدیم کیتابخانانین زئرزه‌مییه گئدن پیلله‌لرینه. قیرجانیردی. ساریلدیق بیربیریمیزه.


چوخ دانیشیردی. قوشولوب اؤیره‌نجی‌لره سئچگی قونوسونو توتور بوراخمیردی. تهران چاخناشیر هایقیرماغا گئدیردی. شولوقلوق اولوردو خیابان‌لار. اؤزونو شولوقلوغا حاضیرلاشدیریردی. قولونا یاشیل باغلاییردی. من گولوردوم. قیزغین قیزغین دانیشیردی. دانیشا دانیشا آز قالا آغلاییردی. گؤتوروب چیخدیم تهراندان. چالوسون خیابانلاری دا کم‌پوش قایناشیردی. گئجه‌لری دنیزه گئدیر گونوزلر یاتیردیق. سئویشیردیک. قولونا باغلادیغی یاشیل باغینی دیلیم‌له اوینادیر گولوشوردوک. هله ده دانیشیردی. او دئموکراسی آدلاندیردیغی داوادان من تورک‌جه‌دن، وورولموشدوم تورک‌جه‌یه، وورولموشدوم دیلیمه. برکه دوشه‌نده، «قیزیل گولم در منی... دسمال اوسته سر منی» اوخویور چیمدیکله‌ییردیم بیله‌سینی.


اوزاق‌لاردا ایلدیریم شاخیردی. بیر یئرلرده گئجه‌نین قوینوندا گیزله‌نن تپه‌گؤزلره دوشونوب یانیمداکی قیزا قیسیلیب سینه‌سینده‌کی قیزیل گولون قوخوسونو آلیر گؤزومو یومورام.




منبع : شریف مردیسانسور اولموش..
برچسب ها : ایدی ,گئدن ,بورالاردا ,یاغیش ,گئدیردی ,ایلک ,آلنینی باسمیش ,قارانلیق ایدی ,توکلری آلنینی ,یاغیش دنه‌لری ,دوداغیم قاچدی ,توکلری آلنینی باسمیش

نئچه‌سسلیلیک؛ رومان؛ بیز

:: نئچه‌سسلیلیک؛ رومان؛ بیز

نئچه‌سسلیلیک؛ رومان؛ بیز


 

رومان باشقا دونیالاری قاورایان، باشقاسینی آنلایان، باشقاسینا مئیدان وئرن و باشقاسینی تانیماقلا اؤزونو تانیماغا چالیشان آلاندا دوغولابیلر. رومان سس‌لر ایچینده سس دئییل، سس‌لرین بیر دوزئیده اولدوغودور. سؤز آتماغا اولوشمور، سؤزلرین بیر یئره برابرجه ییغیلماغی‌دیر. سس‌لرین ائشیدیلمه‌سی‌دیر. بؤیوک روایت‌لرین آنلاتیسی دئییل، خیردا سس‌لرین بؤیوک قورولتایی‌دیر رومان. گوزگودور. سنی و باشقاسینی گؤسترن گوزگو. اولوشماق و گؤسترمک‌دیر رومان. گئج دوغولسا دا، اینجه‌صنعتین اَن گؤزل قولودور رومان. اینجه‌صنعت، گؤزللیک، و اَیله‌نجه‌یه گؤره یارانیر. وارلیغی وارلیق کیمی گؤسترمه‌یه چالیشیر رومان. گئرچک‌لرله دولو یالان دونیادیر و یالانلاردان داشان گئرچک‌دیر. دونیادیر رومان؛ هر کسین گؤروب، دئنه‌ییب یاشایابیلدیغی دونیالار. و ساده‌جه بیر آنلاتی‌دیر رومان، شیرین بیر آنلاتی. آجیلاری شیرینجه دادیزدیران‌دیر رومان. هابئله رومان اوسته گلن شعاری سؤزلر ده دئییل! آنجاق نه‌دیر رومان؟ نه‌ده و هاردا دوغولابیلر؟ و نه‌دن بیزده بو ادبی ژانر آزدیر؟ (ورامی هئچ؟!)

رومان بیر امکان‌دیر. تانیماغا، تانیتدیرماغا، گؤرونمه‌یه، و گؤروندورمه‌یه امکان. بو اوزدن کمیسه «اؤز»ونو و وارلیغینی تانیماسا، هئچ زامان بو امکان‌دان یارارلانا بیلمز. «اؤز»دن کئچیر و «اؤز»ـه دیر رومان. بوتون دین‌لرده، بوتون مکتب‌لرده «اؤز»و تانیماغا بوللو بوللو گؤزل سؤزلر و نصیحت‌لر وار. «اؤز» یا «نفس»ی تانیماق اوچون بشر «افسانه»دن و «حماسه»دن کئچیب «رئال» دونیایا آیاق قویدو. انسان‌اوغلو گؤیدن، مئتافیزیک‌دن آیریلدیغی و اولاغان‌اوستو گوجلرین یوخا چیخدیغی زاماندان اؤزونو «بیرئی» اولاراق تانیماغا و دَیرله‌ندیرمه‌یه چالیشیر. بو زامان «رومان» آدلاندیرابیله‌جه‌ییمیز شئی دوغولور. آنجاق رومان نئجه «اؤز»و تانیتدیریر؟ انسان نئجه اؤزونو رومان‌دا تانیییر و تانیتدیریر؟ و یئنه ده، بیزده بئله‌نچی رومان وارمی؟

اوسته سادالادیغیم اؤزللیک‌لر نئچه‌سسلی رومانین اؤزللیک‌لری‌دیر. روس دوشونور، میخاییل باختین، رومانی نئچه‌سسلی اولماغا باشارابیلن ژانر بیلیر. «نئچه‌سسلی» دئییمی باختین‌ین اؤز دئییم‌لریندن‌دیر و داستایفسکی‌نین رومانلارینین اؤزللیک‌لریندن ساییر؛ عین حالدا باختین تولستوی‌ون رومانلارینی ایسه «تک‌سسلی رومان» آدلاندیریر. باشقا سس‌لره ائش قونوم وئرماق، هر کاراکتئرین اؤز سسی، باخیشی، ایدئولوژیسی بوغولمادان اوزه چیخماق، متضاد سس‌لرین بیریئرده اولماسی و توققوشماسی، شخصیت‌لرین قارشیت سس‌لر ایله بیرگه مؤلف و یازارین سسی برابر اولماق، نئچه‌سسلیلیک اؤزه‌للییی‌دیر. دئموکراتیک آلاندا، دئموکراتیک باخیشلا بئله بیر شئیین اولوشماسی اولاسی‌دیر؛ باشقاسینین وارلیغینی داهمایان آلاندا. دانیشیق اولان اورتام‌دا اوزه چیخابیلر نئچه‌سسلی رومان؛ «دانیشیق»دان آماجیم ایسه میخاییل باختین‌نین تعریفی‌دیر.

تک‌سسلی رومان قورو رومان اولور، دیکتاتورلوق سؤیله‌می‌نه داها اویور. مؤلفین دئدیی سؤز قولاغی کار ائله‌ییر، یا دا کاراکتئرلرین بیرینین سسی باشقا سسلری بوغور. تک‌سسلی رومانین باشاباشیندان یالنیز بیر سس ائشیدیلیر؛ و بو سس رومانین روحونو آلیر، قورودور. تک‌سسلی روماندا، بوللو بوللو کاراکتئر ده اولسا، اونلارین دونیالاری و سؤزلری باشقالاری ایله دانیشیغا گیرمیر، بیربیرینی قاورامیر، و نهایت‌ده اولایلار و سؤزلر مؤلفین یا دا قهرمانین سؤزونون سونوجونا یؤنه‌لیر. تک‌سسلی روماندا اؤزونه‌دایالی (اؤز دونیاسینا دایالی) وارلیق/ایده/شخصیت یوخدور. نئچه‌سسلی رومان سوره‌کلی آختارماق‌دیر، تک‌سسلی ایسه بللی سونوجا وارماق.

آرتیق «اؤز» یا «نفس»ی بیر بیتوو اولاراق تانیماق اوچون نئچه‌سسلی رومان یارارلی اولور یالنیز. رومان‌دا باشقاسینین دونیاسی ایله، باشقاسی دئنه‌ییب یاشادیغی کیمی تانیش اولوروق. باشاریلی رومانی اوخورکن کیمسه یوخدور اؤزو تجربه ائتدییی آنی روماندا گؤرمه‌سین. بعضن اوخوجو اؤزونو تام دیری وارلیق کیمی گؤرور روماندا. بو اوزدن اؤزونو باشقاسینین گؤزوندن گؤره‌بیلیر اوخوجو. بوردا اؤزونو ده گؤرور باشقاسینی دا؛ اوخوجو بیر ده قاییدیب اؤزونه دؤنوب، ایچینه گیرسه «اؤز»ون تانیماغینا نئچه آددیم یاخینلاشیر. آخی «اؤز»و تانیماق یالنیز ایچه دالماق‌لا اولاسی دئییل‌دیر. اصلینده «اؤز»و تانیماق اوچون «باشقاسی»نین گؤزوندن و «اؤز»ون گؤزوندن، ایکی یؤنلو اولاراق یاناشمالی‌دیر انسان. و بو ایکی آچی بیرله‌شیب بیری‌بیرینی اؤرتوشدورمه‌سه «اؤز»و تانیماق یالنیز توهم‌دیر. آنجاق بو (ایکی یؤندن «اؤز»ـه یاناشما) سس‌لرین اؤزگورجه اوزه چیخان رومان‌لاردا گئرچه‌کله‌شه‌بیلر. بیر سسین یوخسا مؤلفین سسی بوتون آلانی قاپسایان رومان اوخوجونو دا او سسین جایناغی آلتینا آلیر. مؤلفین هرنه‌یی بیلدییی و حوکم سوردویو آلاندا باشقا سس‌لر باتیر. دوشونن اوخوجو ایسه آرتیق بو سس‌دن و بو سئیطره‌دن قوتولوب قاچماق ایسته‌ییر.

شعر یا باشقا اینجه‌صنعت قوللارینین نئچه‌سسلی اولماسی چتین‌دیرسه، رومانین نئچه‌سسلی اولماغینا آرتیق زمینه وار؛ آنجاق بو باشارینین الده ائتمه‌یی ایلک اؤنجه نئچه‌سسلیلیگه اینانماق‌دیر. باشقاسینین وارلیغینی گؤرمزدن گلمه‌مک، سسینی بوغماماق، اونو اینکار ائتمه‌مک، دینله‌ییجی آراماماق، دیالوقا کئچمک و بیرکره‌لیک منبَر اوستوندن خالقین آراسینا کئچمک لازیم‌دیر. جانلی دانیشیق یارادماغا طرف‌لرین سسینی قاوراییب ائشیتمک گره‌کیر! دوغروسو رومان بیر دوشونجه، یوخسا وارلیغین اثباتینا اولوشمور؛ رومان اونون گؤسترمه‌یینه چالیشمالی‌دیر.

ایران تورک‌لرینین رومانی سایی‌دا ایزله‌دیییمجه بیر اوقدر دئییل‌دیر (سایماقلا قوتولور دئسم یانیلمامیشام.) اولانلارین چوخو دا بیر سسین یوخسا یازارین سسی آلتدا بوغولور! دانیشیق دئیه، اؤزل کاراکتئر دئیه، اؤزللیک دئیه بیر شئی یوخ‌دور. هر شئی دایازدیر. دیل قونوسونا گلینجه، آرادا بؤیوک چات وار. خالق دیلی ائییتیمین یوخلوغوندا و مرکزیّتین تک‌سسلیگی آلتدا چابالاییر. یازار بوندان قوتولماغا چابا گؤسترمه‌لی‌دیر. آنجاق دانیشیلان دیل‌ده یازماق چلیشکی‌یه قاتلاشماق‌دیر بیر یؤندن.

هر حالدا دَرین رومانین کاراکتئرلری دیری وارلیق کیمی اولمالی‌دیر؛ اؤزونو تام بویلو بوخونلو گؤسترمه‌لی‌دیر. رومان اوخوجوسونو ایناندیرمالی‌دیر، گئرچک‌اوستو اولسا بئله. سؤزومو هاوادا دئمک ایسته‌میرم. ناصر منظوری 1373ده «قاراچوخا» آدلی رومان یازمیش؛ باشقا یئرده دئمیشم، بو رومان بیزیم (بیلدیییم و اوخودوغوم) اَن گؤزل و آدی چکیلمه‌لی رومانلاریمیزداندیر. نه ایسه بو روماندا مؤلفین سسی قولاغی کار ائله‌ییر. کاراکتئر دئیه بیر شئی آرادا اولوشمور. سانکی مؤلفین سؤزونو دئمک اوچون یازیلمیش‌دیر یالنیز. سؤزو ایسه کسین‌دیر. باشقا رومانلاریمیزین بیرچوخو بوتونلوک‌ده یا رومان دئییل یا دا تجربی رومان اولماغا جان آتیر. یازارین حوصله‌سیزلیگی ایله، تلم‌تله‌سیک یازیلمیش، دایاز، جان‌سیز، روح‌سوز و ژورنالیستی بیر عالم‌دیر. ایناندیرماغی وئجینه آلمیر. یازار سانکی سؤزونو یئریتمک اوچون بیر سیندان آلمیش الینه و سؤزجوک‌لرله اوخوجونون بئینین دویور. اؤیکو قولو ها بئله. آنجاق اؤیکوده بیرآز رومان دوروموندان ایره‌لی گئده‌بیلمیش اولساق دا، یئنه مونولوق ایچینده‌ییک! هله گئتملی و آچمالی یول چوخ و اوزوندور.

منبع : شریف مردینئچه‌سسلیلیک؛ رومان؛ بیز
برچسب ها : رومان ,اؤزونو ,نئچه‌سسلی ,باشقا ,آنجاق ,مؤلفین ,تانیماق اوچون ,«اؤز»و تانیماق ,وارلیق کیمی ,تانیماق یالنیز ,سسین یوخسا ,«اؤز»و تانیماق یالنیز

کیتاب چیخارتماق خاطیره‌لری..

:: کیتاب چیخارتماق خاطیره‌لری..


یازماق بلکه ایلک و سون درد اولا بعض یازارلارا؛ نه ایسه بوردا، أن آزی منه، یازماق ایلک آشامادیر.. چوخ زحمت‌له او آشامانی آشیرسان. قولاق تاپسان بیر ایکی نفره اوخویور سؤزلرینی ائشیدیرسن.. املایی غلط‌لری توتورسان.. بیر ده اؤزاؤزووا اوخویور بلکه بیر یئرلرین سیلیسن.. قویورسان قالیر اوستوندن زامان کئچیر.. ایلک یازدیغیندا هیجاندان آخساقلیقلارینی گؤرمورسن.. بیر ایکی هفته بلکه بیر ایکی آیدان سونرا یئنه اوخویورسان.. بعضن یئنیدن یازیرسان او یازینی.. سیلیسن.. دوزه‌لدیسن سونوندا.

یازیلار ییغیلیر، کیتاب اولما حددینه یئتیشیر. هامیسینی ییغیسان بیر داها اوخویورسان. ائدیت ائدیرسن. آدام آختاریرسان صفحه دوزه‌نلییینه.. ناشر آختاریسان.. و اوقدر کیتاب چیخیب کی هر گؤردویون و تانیشدیغین آدام یا شاعیردیر یا اؤیکوچو، یوخسا آنتولوژی توپلاییب‌دیر.. بو اوزدن ناشیرلر ده جاواب وئرمیر سنه. بیری تاپیلیر صفیردن یوزه ایشلری اؤزو گؤرور اؤز یالنیش یولنوشو ایله.. صفحه آرایی دوز دئییل.. جلد طراحیسی بَیه‌نیلمز.. ارشاددان قاباق سؤزجویه گیر وئریلیر.. هر نه! کئچیرسن.

کیتاب باغلانیر. گئدیر اداره فخیمه ارشادا. بیر ایکی آیدان سونرا ائله سؤزلر دئییرلر آغلاماغین گلیر..

منیم ایلک کیتابیما اصلاحیه گلنده اوقدر داریخدیم.. گیردیم ایچیمه.. اوتاغیمدا قالا بیلمه‌دیم.. بیزیم قومدا بیر یئر ده یوخ.. اورک دورالدان یئر داها یوخ بوردا.. آغلایاجاقدیم.. علیرضایا تلگرامدا یازدیم.. ساغ اولوسن بیر آز یاغلی سؤیوش یاغدیردیک اداره فخیمه‌یه.. اوره‌ییم سویودو او آن.. ائله بیر یئرلره بارماق باسمیشدیلار کی آدامین اوراسی گؤینه‌ییردی.. او سؤیوشلر اولماسایدی باغریم ائله همن پارتلایاجاقدی..

ارشادین منه یازدیغی بیر بؤلوم:

«43-جو صحیفه 6-جی سطردن 24-جی سطره کیمی «قیزین ممهلری» سؤزجویوندن «ائتسهیدی اگر» سؤزجویونه کیمی حذف اولونمالی.81-جی صحیفه صفحهنین بوتونلویو حذف اولونمالی..»

بونلار فقط حذف ائتمک فرمانی‌دیر. بونلاری آدام بیرجور هضم ائده بیلیر.. آنجاق بعضن سؤزجویه توخونوردولار.. بیر یئرلری یازمیشدی «این پاراگراف در شأن نویسنده‌گی نیست»! نه دئییم؟

هر نه. کیتاب مجوز آلیر. چاپا گئدیر.. سئوینجدن آدام بیلمیر نئجه قارشیلاسین کیتابین چیخماسینی.. آمما کیتابی آچیرسان تازا گؤزون یئنی یئنی یالنیشلیقلارا ساتاشیر.. بولاردان دا کئچسک.. کیتابی آپاریرسان کیتاب‌ساتانا وئره‌سن.. باخیر.. کیتابی آلت اوست ائدیر.. آچیر.. ایلک جومله‌نی اوخویور.. «باخ مثلا بو کلمه‌نی آخی بیز تبریزده ایشله‌تمیریک آخی..» .. بونو هاراما سوخوم؟


منبع : شریف مردیکیتاب چیخارتماق خاطیره‌لری..
برچسب ها : کیتاب ,ایلک ,آدام ,ایکی ,ائله ,کیتابی ,آیدان سونرا ,ایکی آیدان ,ایکی آیدان سونرا

کؤکسوز دئدی قودو

:: کؤکسوز دئدی قودو

«یول آیریجیندا یازیلمیش حیکایه‌جیک‌لر» کیتابیمدان بیر حیکایه‌جیک


کؤکسوز دئدی‌قودو


شیپ توشدوم یئره. اوجا بیر یئرده قوزالاریمیزی قوراریق؛ اونو چؤزوب دوشنده اوچا بیلمک اوچون، اوچماساق دا بیتیر یاشامیمیز. بیریسی بیزه اؤیره‌تمه‌ییب بونو؛ اؤزوموز بیلیریک. من ایسه قورداق گؤوده‌مده اوجا یئرده قوزا قورماغی نییه دوز بئجرمه‌میشم اؤزوم ده بیلمیرم. اوجا یئرده قورموشام سانیردیم و اوچاجاق ایدیم. نه ایسه قافام اوسته یئره قاپانیب، سانیرام دا اؤلمه‌دیییم آللاهین ایشی اولسون. بوتون عؤمرومو اوچماقدانسا یئریمیشم. یئریمک ده نه یئریمک! بوتون گوندوزو زیر زیبیل اوزونده، کیر ایچینده، پیس قوخو چئوره‌مده. بونلارا دا دؤزسم یئمه‌ییمین بونلاردان اولماغینی سانمیردیم هئچ.

نه ایسه ساغام دا یاشاییرم. سونرلار آتام آنلادیردی کی بالام سن کپه‌نک یوخ پوخ‌بؤجه‌یی‌سن. اینانمامیشام، اینانمارام دا بو کؤکسوز دئدی قودویا.

منبع : شریف مردیکؤکسوز دئدی قودو
برچسب ها : ایسه ,یئرده ,اوجا ,کؤکسوز ,کؤکسوز دئدی ,اوجا یئرده

اوچونجو..

:: اوچونجو..


یول آیریجیندا یازیلمیش حیکایه‌جیکلر؛ اَللی دنه بئش‌یوز سؤزجوک‌دن آز اؤیکوجویو اولان اوچونجو کیتابیم ایشیق اوزو گؤردو. کیتاب ایل‌لر بویو (1386ـ1393) یازدیغیم اوچ‌دؤرد سؤزجوک‌دن بئش‌یوز سؤزجویه قدر سای باخیمیندان اولوشان اؤیکوجوک‌لردیر. اؤنجه «قلمه‌قوزان» و «اولدوزلاردان بیری قایمیشدی» باشلیقلی رومان و اؤیکو ژانریندا بوتانشر یاییم ائوی وریندن یاییلدیغی کیمی، «یول آیریجیندا یازیلمیش حیکایه‌جیکلر» ایسه بو گون چاپدان چیخدی.


حیکایه‌جیکلردن بیری:


«یادیمدا قالان..»


اونوتدوغوم ایستکلر هله ده یادیمدا.


منبع : شریف مردیاوچونجو..
برچسب ها : آیریجیندا یازیلمیش

ائکوأله‌شتیری (Ecocriticism)

:: ائکوأله‌شتیری (Ecocriticism)

یازماغیندا اولدوغوم ائکوأله‌شتیری مقاله‌مدن بؤلوم‌لر (باشلانیشی)


ائکوأله‌شتیری[1] قاورامی ایلک اولاراق ویلیام روکرئت[2] آدلی أله‌شتیرمن وَریندن 1978ده أدبی تنقید ساحه‌سینه «أدبیات و دوغابیلیم: ائکوأله‌شتیری‌ده بیر دئنه‌مه»[3] آدلی مقاله ایله گیردی. آنجاق بو قاورام آمئریکادا 1980لارین سونو و بریتانیادا ایسه 1990 اون‌ایللرین باشلانغیجیندا أدبی تنقید قوللاریندا یئر توتماغا باشلادی.[4] یاشیل مطالعه‌لر[5] عنوانی ایله ده تانینان بو قولون، آمئریکادا چئریل گلاتفئلتی[6] و هارولد فروم[7]ون روکرئت‌له بیرچوخ ائکوأله‌شتیرمنین یازیلارینی توپلادیغی «ائکوأله‌شتیری: یازینسال دوغابیلیم‌ده دؤنگه‌لر»[8] آدلی کیتاب، یایغینلاشماسینا یاردیم ائتدی. گلاتفئلتی کیتابین گیریش بؤلومونده ائکوأله‌شتیرینی، «أدبیات و فیزیکسل چئوره آراسینداکی ایلیشکی‌لری اینجه‌له‌مه» اولاراق تانیتدیریر.[9] آنجاق 1990 ایل‌لریندن ائکوأله‌شتیری، أدبی تنقیدین بیلیم‌سل قوللاریندان بیری اولاراق بیلیم‌یوردلاریندا آیاق توتماغا باشلامیش اولسا دا، هله اوقدر تانینمیش یاخینلاشما طرزی اولان، یوخسا ییغجام و چرچیوه‌لی قورام اولاراق دئییل‌دیر.

دوغا و حیاتین یابانجی گوجلرینه توخونان یازار/یازیلار ائکوأله‌شتیری‌نین أدبی قونوموندا رول اوینایان اولموشلار. اؤرنک اولاراق، رالف والدو ائمئرسون[10]ون 1836دا، اؤز آدی چکیلمه‌دن، یاییلدیغی Nature (دوغا) آدلی کیتابچاسیندا اونا بوراخدیغی دوغا ائتکیسیندن آچیقجا یازمیشدیر.[11] آنجاق ائکوأله‌شتیری آمئریکادا چوخلو دئنه‌ی‌اوستوچولوک[12] فلسفه‌سینه دایالی اولسا دا بریتانیادا 1790 ایللرینین رومانتیزم فلسفه‌سینه کؤکله‌نن یازارلارین یازیلارینا دایانیر. [13] آمئریکادا یازیلان ائکوأله‌شتیری‌دن چوخلو دوغانی «اویماق» قوخوسو آلینسا، بریتانیادا داها چوخ چئوره‌یه وئریلدییی آجی ضرردن «اویارماق» وار[14]؛ اؤرنک اولاراق The Song of the Earth (تورپاق تیرینگه‌سی) آدلی کیتابدا، جاناتان بئیت[15]، یاییلماچیلیق[16] مئشه‌لر و دوغانی بوتونلوک‌له تخریب ائتمک‌ده‌دیر، دئییر.[17]

 



[1] Ecocriticism

[2] William Rueckert

[3] Literature and Ecology: An Experiment in Ecocriticism

[4] Barry, Peter (2009). Beginning theory: An introduction to Literary and Cultural Theory, Third Edition, Manchester University Press. P284

آنجاق Karl Kroeber، آمئریکالی بؤیوک ائکوأله‌شتیرمن، ایلک کز اولاراق «دوغابیلیم» دئییمینی ائکوأله‌شتیری ایله  ایلگیلی قونودا 1974ده «گراسمئرده (Grasmere) بیر ائو: دوغابیلیم قوتساللیق» آدلی مقاله‌سینده ایشله‌تدییینی دئییر.

[5] Green Studies

[6] Cheryll Glotfelty

[7] Harold Fromm

[8] The Ecocriticism Reader:Landmarks in Literary Ecology

[9] Oppermann, Serpil (2006). Doğa Yazınında Beden Politikası, İstanbul Üniversitesi, Edebiyat Fakültesi.

[10] Ralph Waldo Emerson

[11] Barry, Peter (2009). Beginning theory: An introduction to Literary and Cultural Theory, Third Edition, Manchester University Press. P284

[12] Deneyüstücülük (Transcendentalism/Transandantalizm)

[13] ibid.

[14] ibid.

[15] Jonathan Bate

[16] Yayılmacılık (Imperialism/Emperyalizm/İmperializm)

[17] ibid.

منبع : شریف مردیائکوأله‌شتیری (Ecocriticism)
برچسب ها : اولاراق ,آدلی ,ائکوأله‌شتیری ,ecocriticism ,theory ,آمئریکادا ,edition manchester ,third edition ,manchester university ,university press ,press p284 ,edition manchester university ,manchester university press ,third edit

پورنوگرافی یوخسا ائروتیک.. بلکه اعتیراض؟!

:: پورنوگرافی یوخسا ائروتیک.. بلکه اعتیراض؟!



پورنوگرافی یوخسا ائروتیک.. بلکه اعتیراض؟!


 

ولادیمیر ناباکوف یازدیغی «لولیتا» آدلی رومان، اورتا یاشلی بیر کیشینین اون‌ایکی یاشلی بیر قیزا وورولوب آمئریکانین موتئل‌لرینین دولاندیغی‌نی آنلاتیر. رومان باشدان باشا «هامبرت هامبرت» آدلی کیشینین ایچ دویغولارینی آنلاتاراق کئچیردییی اولایلاری، قیزلا (قیزین آدی لولیتادیر!) هارالاردا نه‌لر یاپدیغینی دئییر. ایلک تپکی‌لر بو ادبیات اؤیرتمه‌نین کیتابینا شاشیردیجی اولاراق بویون قاچیرماقدی یایماقدان. اونلار «لولیتانی» پورنوگرافی بیر اثر گؤرورلر! نه ایسه سونرالار اینگلیس دونیاسینین اَن یاخشی رومانلاریندان سایدیلار.

آنجاق پورنوگرافی ایله غیرپورنوگرافی اثر هاردان بللی اولاجاغینا ناباکوفون کیتابینا یازدیغی مؤخره اؤنملی سؤز داشیییر؛ بوراسینی «اکرم پدرام‌نیا»نین ترجمه‌سی ایله یاییلان «لولیتا»نین سونوندا گلن «درباره کتابی به نام لولیتا» یازی‌دان عینن نقل ائله‌ییرم:

هر نویسنده‌ی مطالب شهوت‌انگیز (پورنوگراف) باید از قوانین سخت قدیمی پیروی کند تا مریضش همان امنیت را در خوشی احساس کند که مثلاً هواداران داستان‌های جنایی احساس می‌کنند، داستان‌هایی که اگر هنگام نوشتن آن‌ها مواظب نباشی، ممکن است از ژانر جنایی به نوآوری هنری بدل شوند و حال خواننده را به هم بزنند [..] بدین ترتیب، در رمان‌های پورنوگرافیک هم روابط فیزیکی باید به جماع کلیشه‌ای محدود شود. سبک، ساختار و تصویرهای ذهنی هرگز نباید خواننده را از حس شهوانی ملایمش منحرف کند. رمان باید از صحنه‌های جنسی متناوب برخوردار باشد. بخش‌های گذرای میان این صحنه‌ها هم باید تا حد بخیه‌های حسی، ساده‌ترین شکل از پل‌های منطقی، شرح و وصف‌های کوتاه تنزل یابد. خواننده احتمالاً از این بخش‌ها سرسری خواهد گذشت، اما باید بداند که این‌ها به این منظور آمده‌اند که احساس نکند کلاه سرش گذاشته شده [..]. از آن گذشته، صحنه‌های جنسی کتاب باید خط اوج‌گیرنده را دنبال کنند، و هر بار شکلی نو، ترکیبی نو و گیرایی جنسی نویی را داشته باشند و شمار شرکت کننده‌ها نیز باید پیوسته زیادتر شود [..] و بدین ترتیب در پایان کتاب باید صحنه‌های جنسی بیش از بخش‌های اول آن باشد. (لولیتا/ ترجمه اکرم پدرام‌نیا/ انتشارات زریاب/ ص 421).

ادبیات‌دا گلن ائروتیک صحنه‌لر آنجاق بام‌باشقادیر! 2010ون نوبئل اؤدولونو قازانان «ماریو بارگاس یوسا»، «نییه ادبیات؟» مقاله‌سینده، ادبیاتی سئوگی، دیلک و جینسل ایلیشکی‌لری هنری یارادیجیلیغا یؤنه‌لدن بیر آلان تانیتدیرارکن؛ اونون یوخلوغوندا ائروتیسم یوخدور دئییر. عشق ایله لذت کؤیرَک، چَلیم‌سیز و قولای سَوییه‌یه ائنیر ادبیاتین یوخلوغوندا. تخیل گوجونه یییه‌لی اینجه‌صنعت و اؤزللیکله ادبیات، بو حیوانلا اینسان آراسی اورتاقلیغی یوکسَک دوزئی‌یه قالدیریر. بئله  ایسه، چکینمه‌دن «ائروتیزم» ادبیاتین گئنیش پاییندان ساییلاجاق‌دیر و یوخلوغوندا درین بوشلوق دویولور بو آلاندا.

مئتافوریک دونیانی عکس ائدن ادبیات، هئچ اولماسا دونیادان و دونیانین وارلیغیندان ائتکیله‌نیر. آدلاندیردیغیم بو «دونیا وارلیغی» نه‌دیرسه اؤزونو، هر حالدا، گؤرسه‌دیر اؤزونو ادبیات‌دا. ایچ یوخسا دیش دونیا «کلمه»لرله وار اولور ادبیات‌دا. بو «وار اولماق» یاشامین بؤیوک دویغولارینی گؤرمَزدن گله‌بیلمزدیر هئچ زامان. آنجاق «بؤیوک دویغو»لاردان بیری ده ائروتیک قونوسودور. بلکه ده ان بؤیوگو! اونسوز دا اینجه‌صنعت‌دن آلدیغی ذوق یاشادیغی دویغولارینا دایانیر اوخوجونون. بو بیربیرینی تکمیل ائدن دویغولار اثرین چئشیت‌لی بویالاری ساییلاجاقدیر. نه ایسه ایپ اوزه‌رینده یئریمک کیمی بیر شئی‌دیر و دهَتلی اولمالی‌سان بورالارا وارالی.

بیر یاندان دا، هر حالدا سانسورچو اؤز ایشینده و ایدئلولوژی گؤزلویو ایله یاناشیر اثره! سانسورچونون بو ایشده نه‌قدر بلیرسیز قایداسی وار (قایدا قورال دئیه بیر شئی تعریف اولموش اولورسا اگر)، نه‌قدر شخصی سلقه‌سی وار و اؤز نظرین یئریدیرسه ده، آنجاق بو، یازارین/ یارادیجینین اؤزونون سانسور ائتمه‌سینه قوتارمامالی‌دیر.

قاباقلاردا وورغولادیغیم سؤزو بیر ده دئسم: اصلینده ادبیات اعتیراضا قالخماق‌دیر! بو آرا ایچ دویغولارینا گؤره اعتیراضا قالخان یازار، یاشادیغی هر بیر دویغولاریندان واز کئچیرسه، اؤزونو بیلربیلمز سانسور ائدیرسه، اعتیراضی اعتیراضا بنزه‌میر هئچ! یاراتدیغی اثر ده قوتور قالاجاق. کسین‌لیک‌له ائروتیک یازماق آنجاق هئچ زامان اعتیراض گؤستَرگه‌سی دئییل‌دیر ده. دویغولارین کسیلمه‌دن آخماسی‌دیر سؤزومون جانی. کیمسه نوسخه یازا بیلمز نئجه یازماغا/ یاراتماغا، آنجاق بیلَرک یوخسا بیلمه‌یرک اسکیکلیک اولورسا اثر ابترلیگه یؤنه‌له‌جک‌دیر.

منبع : شریف مردیپورنوگرافی یوخسا ائروتیک.. بلکه اعتیراض؟!
برچسب ها : آنجاق ,ائروتیک ,پورنوگرافی ,ایله ,یوخسا ,یوخلوغوندا ,کتاب باید ,بلکه اعتیراض؟ ,ائروتیک بلکه ,یوخسا ائروتیک ,پورنوگرافی یوخسا ,پورنوگرافی یوخس

محل قرارگیری آمارگیر www.datagozar.com

پاپ کده | کسب درآمد از پاپ آپ چیست , کسب درآمد از پاپ آپ در بلاگفا , کسب درامد از پاپ آپ خارجی , کسب درآمد با پاپ آپ , اس پاپ آپ - سیستم کسب درآمد از پاپ آپ , کسب درآمد ازطریق پاپ آپ , کسب درآمد از اینترنت پاپ آپ , کسب درامد اینترنتی پاپ اپ , اموزش کسب درامد از پاپ اپ , نحوه کسب درامد از پاپ اپ , کسب درآمد از پاپ آپ , بهترین سایت کسب درآمد از پاپ آپ , اسکریپت کسب درآمد از پاپ آپ , سیستم کسب درآمد از پاپ آپ , کسب درآمد از طریق پاپ آپ , کسب درامد از پاپ اپ فیس نما , بهترین سایت های کسب درآمد از پاپ آپ , کسب درآمد بالا از پاپ آپ , بیشترین کسب درامد از پاپ اپ , کسب درآمد از بهترین پاپ آپ ها , بهترین سیستم کسب درآمد از پاپ آپ , چگونه از پاپ اپ کسب درامد کنیم , نحوه کسب درآمد از طریق پاپ آپ , کسب درامد از طریق پاپ آپ - poppop , معرفی سایت های کسب درآمد از پاپ آپ , معرفی سیستم کسب درآمد از پاپ آپ , سامانه کسب درآمد از پاپ آپ , سایت کسب درآمد از پاپ آپ , سیستم کسب درآمد از طریق پاپ آپ , کسب درآمد از راه پاپ آپ , سایت کسب درآمد از پاپ آپ شرکت راه گستر قرن , چگونگی کسب درآمد از پاپ آپ , کسب درآمد از تبلیغات پاپ آپ